ប្រេស៊ីល៖ គណៈកម្មាធិការអូឡាំពិកប្រេស៊ីល បានប្តេជ្ញានឹងចាត់វិធានការទៅលើស្ថាប័នគ្រប់គ្រងកីឡាបាល់ទាត់ ពោលគឺសហព័ន្ធកីឡាបាល់ទាត់ប្រេស៊ីល ក្រោយពេលដែលក្រុមបាល់ទាត់បុរសប្រេស៊ីលដែលឈ្នះមេដាយមាស មិនបានពាក់ឯកសណ្ឋាន (អាវក្រៅ) របស់គណៈកម្មាធិការអូឡាំពិក នៅលើវេទិកាកិត្តិយស ក្រោយយកឈ្នះក្រុមជម្រើសជាតិអេស្ប៉ាញ នាវគ្គផ្តាច់ព្រ័ត្រវិញ្ញាសារបាល់ទាត់បុរសអូឡាំពិក។ 

បញ្ហាចម្រូងចម្រាស់នេះបានកើតមាន ក្រោយពេលដែលប្រេស៊ីលបានទម្លាក់អេស្ប៉ាញដណ្តើមបានមេដាយមាស ហើយនៅលើវេទិកាកិត្តិយស ក្រុមកីឡាករបាល់ទាត់ទាំងអស់ដែលទទួលបានមេដាយមាស មានចេតនាមិនពាក់អាវក្រៅដែលជាឯកសណ្ឋានរបស់គណៈកម្មាធិការអូឡាំពិកប្រេស៊ីល ហើយផ្ទុយទៅវិញពួកគេបានយកអាវក្រៅនោះ ទៅរុំចងនឹងចង្កេះជំនួសវិញ។ 

ទង្វើបែបនេះត្រូវបានអូឡាំពិកប្រេស៊ីលបង្ហាញភាពមិនពេញចិត្ត ជាពិសេសក៏ពាក់ព័ន្ធទៅដល់បញ្ហាម្ចាស់ឧបត្ថម្ភ (Sponsor) ផងដែរ។ គួរបញ្ជាក់ថា ក្រុមហ៊ុនម្ចាស់ឧបត្ថម្ភឯកសណ្ឋានសម្រាប់សហព័ន្ធបាល់ទាត់ប្រេស៊ីលគឺក្រុមហ៊ុន Nike របស់អាមេរិក ខណៈក្រុមហ៊ុនដៃគូឧបត្ថម្ភឯកសណ្ឋានរបស់គណៈកម្មាធិការអូឡាំពិកប្រេស៊ីល​ គឺក្រុមហ៊ុន Peak របស់ចិន៕